Sunday, September 25, 2011

ငါ့သရောက် အိုး ။


ငါ့သရောက် အိုးလုပ်ငန်းဟာ ပုဂံညောင်ဦး၊ မြင်းခြံ၊ တောင်သာ၊ ကျောက်ပန်းတောင်း၊ ပုပ္ပါး နယ်တခွင်မှာ နာမည်ကြီးပါတယ်။ ဘာကြောင့် နာမည်ကြီးလဲ ဆိုတော့ အထူးသဖြင့် ငါ့သရောက်က လုပ်တဲ့ သောက်ရေအိုးက ပူလွန်း တဲ့ နွေကာလမှာ သောက်ရေကို အေးမြစေတဲ့ အတွက်ဖြစ်ပါတယ်။ ငါ့သရောက် မြေက အိုးလုပ်ငန်းအတွက် အထူးသင့်လျှော်တယ်လို့ ဆိုပါတယ်။ အခုဆိုရင် ပုဂံညောင်ဦး ခရိုင်က ငါ့သရောက် ဟာ မြို့နယ် တခုဖြစ်ပါတယ်။ ရာဇဝင် ထဲမှာ နယ်ချဲ့ အင်္ဂလိမ်ကို တော်လှန်ခဲ့တဲ့ သူရဲကောင်း ပုဂံဗိုလ်ချို ဆိုတာ ငါ့သရောက် နယ်သားဖြစ်ပါတယ်။ ငါ့သရောက်အိုးလုပ်ငန်းက ထွက်တဲ့ အိုးခွက်တွေက ကျွန်တော် သိသလောက် ရေးပြပါမယ်.. တချို့ကို နာမည် မမှတ်မိပါဘူး။ သောက်ရေအိုး၊ ရွက်အိုး၊ ရေအင်တုံ၊ ဟင်းချက်အိုး၊ ကောက်ညှင်းပေါင်းအိုး၊ ထန်းရေထည့်တဲ့ မြူအိုး၊ ညောင်ရေအိုး၊ မုန့်ပြားသလက်လုပ်တဲ့ အိုးခင်း၊ စလောင်းဖုံး၊ ပန်းအိုး စသည်ပေါ့ ရှိပါတယ်။ အိုးပုတ် ချိုးရုပ် တွေလဲ ရှိတယ်။ သောက်ရေအိုးကတော့ လူတိုင်းသိပါတယ်။ အခုခေတ်မှာတော့ ရေသန့်ဗူးက နေရာဝင် ယူနေပါပြီ။ ရွက်အိုးကတော့ အပျိုလေးတွေရေခပ်ဆင်းတဲ့ တပိုင်တနိုင် အရွယ်အစား အိုးဖြစ်ပါတယ်။ မိန်းကလေးတွေ ရေအိုးရွက်တာ ခေတ်ကုန်သလောက်ရှိပြီ..။ အခုတော့ သံပုံး ရေထမ်းကို သုံးကြတယ်။ ခေတ်ကာလနဲ့ တစ်ခေါက် တစ်အိုးနဲ့ အလုပ်မဖြစ် ဘူး။ ရေတစ်ထမ်းဆို နှစ်အိုး တခါတည်းရတယ်။ နောက်တခု ရေအင်တုံ ဆိုတာ ယက်ကန်းလုပ်ငန်းတွေမှာ သုံးတယ်။ ဟိုးတုန်းက ကျေးလက် မှာ အိမ်တိုင်း ယက်ကန်းစင်ရှိတယ်။ ယက်ကန်းသုံး ဝါချည်ကို ဗိုင်းငင် ခြည်ချ .. ခြည်ခင်ကို ရေစိမ် ထမင်းလုံးနယ် ၊ ဆေးဆိုး အဲလို အခါမှာ ရေအင်တုံကို သုံးတယ်။ ပီးတော့ ဟင်းချက်အိုးမှာ ပဲဟင်းအိုးက အရွယ်ကြီးတယ်။ အသားငါးချက်တဲ့အိုး အငယ် ဆိုဒ်ကတော့ မျိုးစုံရှိတယ်။ မြေအိုး နဲ့ ချက်တာ ခေတ်ခဏ တိမ်သွားပေမယ့် အခုဆို မြေအိုးမီးရှည် လို အစားအစာတွေမှာ မြေအိုးသုံးချက် တဲ့ အရသာကို ထူးခြားစွာ ဆွဲလန်းနေဆဲ။ မြေအိုးချက်က တကယ် ကောင်းပါတယ်။ အရသာရှိတယ်။ ကောက်ညှင်းပေါင်းတဲ့ အိုးက ပုံစံ တမျိုးဗျ.. မျက်စေ့ထဲမြင်အောင် မပြောပြတတ် ဘူး။ ထားတော့.. ။ ထန်းရေထည့်တဲ့ မြူအိုးကျတော့ အခုထိသုံးဆဲ.. ဒါကျတော့ သိတယ်။ ထန်းရေခံတာ မြူအိုးနဲ့မှ အရသာရှိတယ်။ ညောင်ရေအိုးတော့ အခု သိပ်မသုံးကြတော့ပါဘူး။ ကြွေအိုး၊ ဖန်အိုး ၊အမြောက်စံ တွေ သုံးလာတယ်။ ငါ့သရောက် ညောင်ရေအိုးက သပြေခက်ကို စိမ်းတက်နေအောင် ထိန်းထားနိုင်တယ်။ နှစ်တရာကို အမြစ်ပွားစေတယ်။ ပန်းသည်တွေက ငါ့ပန်းတွေ ငါ့သရောက် အိုးနဲ့ ဘုရားပန်းထိုးကြ လို့ သူတော် ချင်း သတင်းလွေ့လွေ့ ပေါင်းဖက်တွေ့တယ်ဆိုပဲ။ အိုးပုတ် ချိုးရှုတ်ဆိုတာ သိတယ်မလား။ ငယ်ငယ်က ခွက်တန်း ကစားကြတယ်။ သဲတွေထည့်ပီး ထမင်းချက်တယ်။ မန်ကျီးရွက်တွေခူး ဟင်းချက်တယ်။ ကလေးဘဝ အသုံးဆောင်လေးတွေပါ။ တကူးကူး.. ကူး.. မြည်တဲ့ ချိုးရုပ်လဲ ကြိုက်တယ်။ ငါ့သရောက်က ကျောက်ပန်းတောင်းနဲ့ မြေနီကျောက်ခင်းလမ်းရှိတယ်။ အိုးလှည်းတွေ လာလို့ လမ်းပေါက်တာလဲဖြစ်မယ်ထင်တယ်။ တချိန်က ငါ့သရောက်အိုးက အညာတခွင် နာမည်ကြီးပါပဲ။ အခုထိလဲ နာမည်ကြီးဆဲ........။
သုံးလွန်းတင်မှ ကြိုး.. ဒေါင်ဒေါင်မည်မှ .. ငါ့သရောက်အိုး.. ဆိုရိုး သည်လိုရှိခဲ့ တယ်... လို့ သီချင်း ဆိုလို့ ရောင်းကြတယ်။ ။
ကျွန်တော် သိသလိုရေးပါတယ်။ အမှားပါရင် မှတ်ချက်ပေးပါ။ ။
ဆန်းဝင်း (ကျောက်ပန်းတောင်း) ။

No comments: