Thursday, May 28, 2009

ပိုက်စံ သို့မဟုတ် ငွေ ။

ကျနော် ဒီအရွယ်ထိ ငွေကို မဆုဖူး ပါ။ ဘယ်လိုဆုရမည်လည်း မသိပါ။ အမှန်တိုင်း ပြောရလျှင် ငွေကိုခင်းပြီး လျှောက်နေတယ်။ စိတ်ကူးပေါက်ရာ လုပ်ပစ်လိုက်တယ်။ နောင်ခါလာ နောင်ခါဈေး ဆိုသလိုပေါ့။ ဒီတော့ ကျနော်က မှ ငွေကို မခင်တာ ငွေဆိုတဲ့ အရာက ကျနော့် အနားမှာ ဘယ်ရှိပါမလဲနော်။

စီးပွားရေးနဲ့ပတ်သက်ပြီး စာအုပ်တွေဖတ် သူများပြောရင် ဆရာကြီးလိုလို ဘာလိုလိုနဲ့ ဝေဖန်ရေးလုပ်။ ဘယ်စာအုပ်မှာတော့ ဘယ်လိုရေးတာ။ အမှန်ကတော့ မမှားဘူး။ လက်တွေ့မှာတော့ ရှိရင်ရှိသလို မရှိရင် ဗိုက်မှောက် ရေသောက်မယ့် အစား။ ကျနော် လက်သုံး စကား တခုရှိတယ်ဗျ။ ငါက ငွေနောက်လိုက်နေတာ မဟုတ်ဘူး စိတ်ချမ်းသာမှု နောက်လိုက်နေတာကွ။ ရခဲလှတဲ့ ဘ၀မှာ ပျော်သလိုနေတယ်။ ငွေနောက်လိုက် ရင်ငွေရမယ် - ဆိုတာမျိုးပေါ့။

ကိုယ်ပိုင် ဥစ္စာတဲ့။ ဘယ်မှာလဲ ဆန်းဝင်း မင်းမှာ ဘာရှိလဲ။ ခရီးသွား အိတ်တလုံး။ အ၀တ်အစား လေးငါးစုံ။ နိုကီယာ ဟန်းဖုန်းတလုံး ။ ဟား .ဟား.. အော် ဖြစ်ရလေ။ ငွေရဲ့ကျေးကျွန် မဖြစ်စေနဲ့လို့ တော့ ကိုယ့်ကိုယ်ကို ခဏခဏ ပြောမိပါရဲ့။ တကယ်တန်းကျတော့ အဲဒီ ငွေကို ကျွန် အဖြစ် ခိုင်းစားဖို့ ၊ ငွေကိုငွေနဲ့ ရင်းဖို့ ဘယ်မှာ လဲ မင်းဆုထားတာ။ တော်တော် အသုံးမကျတဲ့ကောင်။

ငွေအကြောင်းပြောရတာလဲ သိပ်မကောင်းဗျ။ အပေါင်းသင်းဖျက်တာ ငွေတဲ့။ ငွေက မိတ်ပျက်စေတယ်လေ။ မိဘ မောင်နှမ ဆွေမျိုးသားချင်း စိတ်ဝမ်းကွဲအောင် ခွဲတတ်တယ်တဲ့။ အင်း ခက်တော့ အခက်သားလား။ မရှိမကောင်း ရှိမကောင်း။ မရှိလဲကောင်း ရှိလဲကောင်တဲ့။

(စကားမစပ်ဗျာ.. အခုတလော နားပါဦးမည် ဆိုတဲ့ ဘလော့ဂါတွေ များများလာတယ် ၊ ကျနော့်အထင်တော့ ငွေရှာတော့မယ်ထင်တယ်။ နည်းလမ်းရှိရင် ပြောကြဦးနော်)

Monday, May 25, 2009

မြင်ရောင်မိတယ်။

အမေ...
အမေနဲ့ခွဲခွာနေရတာ ကြာလေလေ
အမေ့ကို ပိုလွမ်းလေလေ ပဲအမေရယ်။
သားကိုလွမ်းနေတဲ့ အမေ့မျက်နှာကို
သား မြင်ရောင်နေမိတယ် အမေ။

မှတ်မိသေးတယ် ..
ဟိုး.. ငယ်စဉ် ကလေးဘ၀က
တနေကုန် အလုပ် နဲ လက် မပြတ် တဲ့အမေ။
အငယ်ကောင် အကြီးကောင် နဲ့ အလုပ်တွေ ရှုပ်နေတဲ့အမေ။
နေရောင်ရှိနေတဲ့ တနေ့လုံး
အဝေးက အမေ့ သားကြီးကို မလွမ်းအားဘူး။

ည အိပ်ယာဝင် သားတွေ သမီးတွေ စုံတော့
အကိုကြီး အကြောင်းပြောကြရင်း
အမေလေ.. အမေ့သားကြီးကို လွမ်းပြီး ငိုခဲ့တာ
သားမှတ်မိနေသေးတယ် အမေ....။

အခု သား အလှည့်မှာ အမေရယ်
ညည သားကိုလွမ်းလို့ ငိုနေမယ့် .. အမေ့မျက်နှာကိုလေ
သားမြင်ရောင်နေမိတယ် အမေ..

အားမငယ်ပါနဲ့ အမေရယ်
သား အမေ့ရင်ခွင်ကို အမြန်ဆုံးပြန်လာမယ်။

Friday, May 22, 2009

ဒီမိုကရေစီနိုင်ငံ နှင့် ကွမ်းစားခြင်း အနုပညာ

ရွှေမြန်မာများ ကွမ်းစားခြင်း သည် ရှေးရှေး ကတည်းက အစပြုခဲ့ခြင်း ဖြစ်သည်။ ရာဇ၀င်တွင် ကွမ်းစားပြီး တိုင်ကို ထုံးသုတ်မိသော မင်းကြီးသည် မိမိကိုယ်ကိုယ် အပြစ်ပေးကာ လက်ကို ဖြတ်သည်ဟု ကြားဖူးသည်။ စည်းကမ်း ဟူသည် လူ၏တန်ဖိုးဟု စာသင်ကျောင်း တွင်လည်း သင်ခဲ့ဖူးသည်။ စည်းကမ်းမရှိပဲ ကောင်းမွန်တဲ့ လူမှု ပတ်ဝန်းကျင် တစ်ခု တည်ဆောက်ဖို့ အတော်ခက်ခဲမည် ဟု ပညာ ရှင်တို့ ဆိုကြသည်။

စင်္ကပူကဲ့သို့ လွတ်လပ်သော ဒီမိုကရေစီ နိုင်ငံတွင် စည်းကမ်းချက် များစွာတွေ့ရသည်။ ပြတ်သားစွာ အရေးယူ သည်ကိုလဲ တွေ့ရသည်။ တနေ့ကဖြစ်သည်။ အတူနေ သူငယ်ချင်း (safety supervisor) တစ်ဦး မြောင်းထဲသို့ ကွမ်းသွေး ထွေးမိ၍ ဒဏ်ငွေ ဆောင်လိုက်ရ သည်။ သူသည် ကွမ်း အလွန်ကြိုက်သူ ဖြစ်သည်။ ကွမ်းကို ကိုယ်တိုင် ပြုလုပ်ကာ စားတတ်သည်။

ယခု ဖြစ်သော ကွမ်းသွေးထွေးခြင်း အမှုသည် ခွင်လွတ်နိုင်သော အခြေနေဖြစ်သည်။ ဖယ်ရီ စောင့်နေစဉ် လမ်းဘေး ရေမြောင်းထဲသို့ ကွမ်းသွေး ထွေးလိုက်သည်။ လမ်းမပေါ် ထင်သာမြင်သာ သော နေရာတွင်မဟုတ်။ အမှုမဲ့ အမှတ်မဲ့ပင်ဖြစ်သည်။ သိုသော် ရဲကားနှင့် ပက်ပင်းတိုး သည်။ ဒဏ်ငွေ စင်္ကပူဒေါ်လာ 250 s$ ရုံးတွင် ပေးဆောင်ရန် ပါမစ်နံပါတ် ပါသော ဖြတ်ပိုင်းတစ်ခု ပေးခဲ့သည်။ သတ်မှတ် ရက်အတွင်း ဒဏ်ငွေပေးဆောင် ရန်သာရှိသည်။ မပေးဆောင်က စည်းကမ်း ဥပဒေ အတိုင်း ရှေ့ဆက်ပေလိမ့်မည်။

ဤတွင်ခေါင်းထဲသို့ အတွေးတစ်ခုဝင်ရောက်လာသည်။ လွတ်လပ်ခြင်း ဒီမိုကရေစီ သဘောတရားသည် လမ်းဘေး မြောင်းထဲ ကွမ်းသွေးထွေးရန် မဟုတ်ဟု နားလည်ရသည်။

Wednesday, May 20, 2009

သူခိုးက လူလိုဟစ်

ကာလနှယ် ဆိုးပါဘိ၊‎
သူခိုးက လူလူ၊‎
တောလေ့ပေါက် နန်းမူ၊‎
အိမ်သူကို ဧည့်စောင်း၊‎
သူကောင်းကို အပြစ်တင်၊‎
တောင်ယာရှင် မျောက်လိုက်လို့မောင်း။ ။

Wednesday, May 13, 2009

download

ဒီက ဆော့ဝဲ ကိုဒေါင်းလုတ် လုပ် ပြီး
ဒီဆိုဒ်မှာ ဂိမ်းတွေ၊ ဗွီဒီယိုတွေ၊ ဆော့ဝဲတွေ အတော်များများ ဒေါင်းလုတ် လုပ်လို့ ရပါတယ်။

စမ်းကြည့်ကြပါဦး။

Saturday, May 2, 2009

လယ်တော

မိုးကောင်းကင်တွင်
မိုးသားတိမ်တိုက်တို့ မှိုင်းညို့ညို့။
ဦးခေါင်းကို မော့်ကြည့်မိခိုက်
တိမ်တိုက်များ၏နောက်ကွယ်မှ
နေခြည် တစ်ချို့ ထိုးထွက်လာသည်။

အဝေးဆီတွင်
စိမ်းမြမြ စပါးပင်တွေရယ် ယိမ်းကလို့နေ။
အနီးကပ်မြင်တွေ့ရတဲ့
စပါးပင် ပင်စည်ထက်မှာ ဖုံးလုံး ကိုယ်ဆီနဲ့
ပင်ပျို အလှနဲ့ ရှက်သွေးကြွလို့ မျက်လွာလေးချထားလေရဲ့။

ကန်သင်းရိုးကို ဖြတ်အကူးမှာ
ဖားပေါင်စင်းလေး တစ်ကောင်
ကောက်ပင်ကြားကို ဒိုင်ပင်ပစ် သွားလေရဲ့။
ကတွတ်ဝက ရေအိုင်လေးထဲမှာတော့
ငါးပြေမ လေး တစ်အုပ် စိန်ပြေးတန်း ကစားလို့နေတယ်။

မြစိမ်းရောင် အရွက်တွေနဲ့ ၀ါဆိုပင်မှာ
ဆက်ရက် ငှက်ငယ်တို့ ဆူဆူညံလို့။
သာယာတဲ့ လယ်တောတခွင်
ရသစုံ ပန်ချီကားတချပ် အဖြစ်
အဘယ်သို့ မှတ်တမ်းတင်အံနည်း။

နေညိုညို ညနေဆောင်း တော့
လယ်ကန်စွန်း တဆုပ် ခူးပါလို့
လာလမ်းအတိုင်း ပြန်ခဲ့တယ်။